Өзбекстанда Тұрақты даму мақсаттары бойынша студенттік Олимпиада өтті

Тұрақты даму мақсаттары бойынша студенттер олимпиадасының ұлттық деңгейі өткен келесі мемлекет Өзбекстан болды. Конкурс 2021 жылы 9 және 12 сәуірде өтті.

Іс-шара № 6, 7, 9 және 13 тұрақты даму мақсаттары бойынша болашақ мамандар мен студенттердің әлеуетін арттыруға және білімдерін тереңдетуге бағытталған және келесі үш секциядан тұрды:

• Су ресурстарын бірігіп басқару,
• Климаттың өзгеруі және таза энергия,
• Индустрияландыру, инновациялар және инфрақұрылым.

Олимпиаданың ресми ашылуы Қазақстан-Неміс университетінің (DKU) серіктес ЖОО болып табылатын Ташкент ирригация және ауыл шаруашылығын механикаландыру инженерлері институтының ғимаратында өтті.

Олимпиада онлайн форматында өткен 2 кезеңнен тұрды:

1 кезең — жазбаша тестілеу,

2 кезең — қазылар алқасымен сұхбаттасу.

1-ші кезеңге қатысушылардың жалпы саны Өзбекстан ЖОО-нан 50-ге жуық студентті құрады. Сұхбатқа 1 кезеңде ең көп балл жинаған қатысушылар шақырылды. Жазбаша және ауызша кезеңдер арасында олимпиадаға қатысушылар су бойынша Орталық Азия жастар желісі туралы презентацияны тыңдауға, сондай-ақ осы желінің ұлттық үйлестірушісіне өз сұрақтарын қоюға мүмкіндік алды.

2-кезеңнің жеңімпаздары аймақтық кезеңге қатысу туралы ақпаратты өздерінің электрондық пошталарына алады.

DKU Ташкенттің ирригация және ауыл шаруашылығын механикаландыру инженерлері институтына және Өзбекстанның басқа жоғары оқу орындарына Олимпиаданы өткізуге мүмкіндік пен жағдай ұсынғаны үшін алғыс білдіреді.

Іс-шараны DKU Табиғи ресурстар институты «CAY4W» Орталық Азия су жөніндегі жастар желісімен бірлесе отырып, Швейцария даму және ынтымақтастық жөніндегі агенттігі (SDC) мен Дүниежүзілік банктің қаржылық қолдауымен, сондай-ақ жаһандық су әріптестігінің және Азия мен Тынық мұхитқа арналған экономикалық және әлеуметтік комиссияның (АТМЭӘК) сараптамалық қолдауымен БҰҰ-ның Алматы қаласындағы ақпараттық орталығымен бірлесіп ұйымдастырды.